കോഴിക്കോട് ബ്ലോഗ് അക്കാദമി

വടകര ബ്ലോഗ് ശില്‍പ്പശാല ചിത്രങ്ങള്‍

2009-05-05T11:22:00.000-07:00

കോഴിക്കോട് ജില്ലയില്‍ നടക്കുന്ന രണ്ടാമത് ശില്‍പ്പശാലയാണ് വടകരയില്‍ മെയ് 3 ന് നടന്നത്.
കൊഴിക്കോട് അന്നേ ദിവസം റഹ്മാന്റെ ജയ്ഹോ സംഗീതപരിപാടിയും, തൃശൂരില്‍ പൂരവും നടക്കുന്നുണ്ടെന്നതിനാല്‍ ശില്‍പ്പശാലയില്‍ ബ്ലോഗേഴ്സ് ഇല്ലാതെവരുമോ എന്നൊരു ആശങ്ക തോന്നിറ്റ്യിരുന്നു. ആശങ്കയെ അസ്ഥാനത്തക്കിക്കൊണ്ട് ഉച്ചക്കു നടക്കുന്ന പരിപാടിക്ക് രാവിലെ മുതല്‍ ബ്ലോഗേഴ്സ് വന്നുകൊണ്ടിരുന്നു. തിരുവനന്തപുരത്തുനിന്നുള്ള ചാണക്യനായിരുന്നു ആദ്യമായി എത്തിച്ചേര്‍ന്നത്. തുടര്‍ന്ന് മുള്ളൂക്കാരന്‍ ,ഇ.എ.ജബ്ബാര്‍, മണിക്കുട്ടി, നിത്യന്‍, കച്ചറ, വിനയ, അരീക്കോടന്‍, അഡ്വക്കേറ്റ് ഭാസ്ക്കരന്‍, ഡി.പ്രദീപ് കുമാര്‍, ... തുടങ്ങിയവരും എത്തിച്ചേര്‍ന്നു. ബ്ലോഗാര്‍ത്ഥികളില്‍ പലര്‍ക്കും ഇംഗ്ലീഷ് ബ്ലോഗുള്ളവരായിരുന്നു.
ഓഡേസ സത്യന്‍ തന്റെ പ്രൊജക്റ്റര്‍ ശില്‍പ്പശാലക്ക് ഉപയോഗപ്പെടുത്താനായി നല്‍കിയതിനാല്‍
പ്രൊജക്റ്ററന്വേഷിക്കേണ്ടി വന്നില്ല. കടത്തനാടന്‍ ശില്‍പ്പശാലക്കുവേണ്ടി മാത്രമായി ഒരു ഹൈ സ്പീഡ് ഈവിഡിഓ ഇന്റെര്‍ നെറ്റ് കണക്ഷന്‍ എടുത്ത് നെറ്റ് ഉറപ്പുവരുത്തിയിരുന്നു. കൂടാതെ ഡി. പ്രദീപ് കുമാറും തന്റെ ഈവിഡിഓ കണക്ഷനും ,ലാപ് ടോപ്പും കൊണ്ടുവന്നതിനാല്‍ ശില്‍പ്പശാല സുഗമമായി നടത്താനായി. മണിക്കുട്ടിയും, കച്ചറയും, മുള്ളൂക്കാരനു മുള്ളതിനാല്‍ സാങ്കേതികപ്രശ്നങ്ങളൊന്നും തടസ്സപ്പെടുത്താതെ ശില്‍പ്പശാല ഭംഗിയായി നടന്നു.

ശില്‍പ്പശാലാ കമ്മിറ്റി സെക്ര്ട്ടറി ശശിധരന്‍ ബ്ലോഗ് എന്ന മാധ്യമത്തിന്റെ ഭാവിയിലെ പ്രസക്തിയെക്കുറിച്ച് സംസാരിച്ചുകൊണ്ട് ശില്‍പ്പശാല തുടങ്ങി. തുടര്‍ന്ന് ഈ.എ.ജബ്ബാര്‍ ബ്ലോഗിന്റെ സാധ്യതകളെക്കുറിച്ചും,അദ്ദേഹം ബ്ലോഗറാകാന്‍ ഇടയാക്കിയ സന്ദര്‍ഭത്തെക്കുറിച്ചും സംസാരിച്ചു.
അതിനുശെഷം ഡി.പ്രദീപ്കുമാര്‍ മലയാളം യൂണികോഡ് ഫോണ്ടുകള്‍ ഇന്‍സ്റ്റാള്‍ ചെയ്യുന്നതിനെക്കുറിച്ചും, എഴുത്തുപകരണമായ കീമാന്‍ ഇന്‍സ്റ്റാള്‍ ചെയ്യുന്നതിനെക്കുറിച്ചും ക്ലാസുകളെടുത്തു. അതിനുശേഷം ബ്ലോഗ് എങ്ങിനെ തുടങ്ങാം എന്നു ഡെമോ നടത്തി.
ഇടവേളയില്‍ അരീക്കോടന്‍ മാഷും, വിനയയും, മുള്ളൂക്കാരനും ബ്ലോഗര്‍മാരോട് തങ്ങളുടെ അനുഭവങ്ങള്‍ വിവരിച്ചു.

അതിനുശേഷം ഏതാനും ബ്ലോഗാര്‍ത്ഥികള്‍ക്ക് മണിക്കുട്ടിയും, മുള്ളൂക്കാരനും ബ്ലോഗാരംഭം നടത്തി. രജിസ്റ്റ്രേഷന്‍

വിനയയുമായി സംസാരിക്കുന്ന നിത്യന്‍,അരീക്കോടന്‍,ഡി.പ്രദീപ്കുമാര്‍...

സംഘാടകരുടെ ശുഷ്ക്കാന്തി. കടത്തനാടന്‍ ,ശശിധരന്‍,ബാബു...

ഓഡേസ സത്യന്‍,കൃഷ്ണന്മാഷ്,ജബ്ബാര്‍ മാഷ്...

സ്ത്രീ പ്രാതിനിധ്യം

ചിരിക്കുമുന്‍പേ... കുറച്ചു ചിന്ത.

അപര്‍ണ്ണ അച്ഛന്റെ പ്രസംഗം കേള്‍ക്കുകയാണ്. കൂടെ മുള്ളൂക്കാരന്‍

ബ്ലോഗിലേക്ക്... മുന്നോട്ട്,മുന്നോട്ട്..

മണിക്കുട്ടിയുടെ ചിന്തകള്‍ ! ചൂടില്‍ വിയര്‍ത്തുകുളിച്ചിരിക്കുന്ന പ്രദീപ് കുന്മാര്‍

ബ്ലോഗിനു പുറത്ത് കുറച്ചു സംസാരിക്കാം.

ജബ്ബാര്‍ മാഷുടെ പ്രസംഗം

ഡി.പ്രദീപ്കുമാര്‍

ശശിധരന്‍ മാഷ്

വിനയ

മുള്ളൂക്കാരന്‍

നാട്ടില്‍ പ്രശ്നമൊന്നും ഇല്ലല്ലോ അല്ലേ ?

ശശിധരന്‍ മാഷ്

വടകര ബ്ലോഗ് ശില്‍പ്പശാല ഇന്ന്

2009-05-02T23:06:00.000-07:00

വടകര മുനിസിപ്പല്‍ പാര്‍ക്ക് ഓഡിറ്റോറിയത്തിനുമുന്നില്‍ സംഘാടക കമ്മിറ്റി അംഗങ്ങളായ കടത്തനാടന്‍,അഡ്വക്കേറ്റ് ഭാസ്ക്കരന്‍ ,ഷെര്‍ളിന്‍ ദാസ് എന്നിവര്‍ ചര്‍ച്ചയില്‍ !

മുനിസിപ്പല്‍ പാര്‍ക്ക് ഓഡിറ്റോറിയം

ഇന്ന് ഉച്ചക്ക് 1 മണിക്ക് ആരംഭിക്കുന്ന മലയാളം ബ്ലോഗ് ശില്‍പ്പശാലയില്‍ പങ്കെടുക്കുന്നതിനായി കേരളത്തിന്റെ വിവിധ ഭാഗങ്ങളില്‍നിന്നായി ബ്ലോഗര്‍മാര്‍ വടകര മുനിസിപ്പല്‍ പാര്‍ക്ക് ഓഡിറ്റോറിയത്തില്‍ എത്തിക്കൊണ്ടിരിക്കുന്നു. ചാണക്യന്‍ രാവിലെ 5 മണിക്കേ എത്തിച്ചേര്‍ന്നിരിക്കുന്നു. ഡി.പ്രദീപ്കുമാര്‍,അരീക്കോടന്‍,മുള്ളൂക്കാരന്‍,ലുട്ടു എന്നിവര്‍ എത്തിക്കൊണ്ടിരിക്കുന്നു.കടത്തനാടന്റെ നേതൃത്വത്തിലുള്ള സംഘാടകര്‍ എല്ലാ തയ്യാറെടുപ്പുകളും വളരെ ഭംഗിയായി നിര്‍വ്വഹിച്ചിരിക്കുന്നു.

ഛലോ..ഛലോ.. വടകര

2009-04-26T04:04:00.000-07:00

മെയ്‌ 3 വടകര ബ്ലോഗ്‌ ശിൽപശാലയുടെ ഒരുക്കങ്ങൾ പൂർത്തിയാവുന്നു.പൊതു തെരഞ്ഞെടുപ്പിന്റെ പതിവിൽ കവിഞ്ഞവാശി സൃഷ്ടിച്ച അശ്വസ്ഥതകൾ ഒഴിഞ്ഞുമാറാൻ കൂട്ടാക്കാതിരിക്കുന്നതും,മേടസൂര്യന്റെ ദയാരഹിതമായ തീക്കണ്ണുകളെയും സ്വാഗതസംഘം വകവെക്കുന്നില്ല. ലക്ഷ്യം ശിൽപശാലയുടെ വിജയം ഗംഭീരമാവണം എന്നു മാത്രം...ഛലോ..ഛലോ..വടകര...വടകര റെയിവേസ്റ്റേഷനിൽ നിന്നായാലും പഴയ ബസ്സ്‌ സ്റ്റാന്റിൽ നിന്നായാലും പുതിയ ബസ്സ്‌ സ്റ്റാന്റിൽ നിന്നായാലും 10 രൂപയുടെ ഓട്ടോ പോയിന്റിൽ മുനിസിപ്പാൽ പാർക്കിന്നുള്ളിലുള്ള ഓഡിറ്റോറിയത്തിൽ എത്തിച്ചേരാം .ഓഡിറ്റോറിയത്തിൽ കന്റീൻ സൗകര്യമുണ്ട്‌.സ്വാഗതസംഘത്തിന്റെ ഇടപെടലുകളില്ലാതെ അവിടെ നിന്ന് ആർക്കും ഭക്ഷണം കൊടുക്കാറുണ്ട്‌.പ്രത്യേകിച്ച്‌ ഇക്കാര്യത്തിൽ ആരുടെയെങ്കിലും സ്വാതന്ത്ര്യത്തെയേ തന്നിഷ്ടത്തയോ സ്വാഗത സംഘം തടയുന്നില്ല.BSNL ഓഡിറ്റോറിയത്തിന്നകത്തേക്ക്‌ താൽക്കാലികwireless data net connectionഅനുവദിച്ചു തന്നിട്ടുണ്ട്‌.പത്രസമ്മേളനം 28 ന് 4മണിക്ക്‌ വടകര പ്രസ്സ്ക്ലബ്ബിൽ വിളിച്ചു ചേർത്തിട്ടുണ്ട്‌.ശിൽപശാലയിൽ പങ്കെടുക്കുമെന്ന് അറിയിച്ച ബഹുമാന്യ ബ്ലോഗർ മാരിൽ ചിലർ...ചാണക്ക്യൻ,ചാർവ്വാകൻ,ചിത്രകാരൻ,മഹേഷ്‌ മങ്ങലാട്ട്‌,അരീക്കോടൻ,മുള്ളൂക്കാരൻ,ലുട്ടു,അനിൽ@ബ്ലോഗ്‌,D പ്രദീപ്കുമാർ,ea ജബ്ബാർ മാസ്റ്റർ ,ചന്ത്രക്കാരൻ,തോന്ന്യാസി,കുമാരൻ,നിത്യൻ,വത്സലൻ വതുശ്ശേരി.മാരീചൻ,JA,സുനിൽ കെ ഫൈസൽ, കെ പി സുകുമാരൻ അഞ്ചരക്കണ്ടി,ജോസഫ്‌ അമ്പൂരി,വഹാബ്‌,.....[തുടരും]

മെയ്‌ 3. വടകര ബ്ലോഗ്‌ ശിൽപശാല

2009-04-21T06:00:00.000-07:00

മെയ്‌ 3 ന്റെ വടകര ബ്ലോഗ്‌ ശിൽപ്പശാലയുടെ
ഒരുക്കങ്ങൾ ഏകദേശം പൂർത്തിയായി.
പത്രവാർത്തകൾ,ബാനറുകൾ,നോട്ടീസ്‌,എന്നിവയിലൂടെ പ്രചരണപ്രവർത്തനങ്ങൽ നടന്നുകൊണ്ടിരിക്കുന്നു.
പത്രസമ്മേളനം 25 ന്ന് വിളിച്ചിട്ടുണ്ടു.
ഓഡിറ്റോറിയത്തിന്നകത്തേക്ക്‌ high speed broad band നെറ്റ്‌ കണക്ഷൻ കിട്ടുന്നതിന്ന് വേണ്ടി bsnl മായി ബന്ധപ്പെട്ടിട്ടുണ്ട്‌.
2500 ലൂമിനെൻസ്സുള്ള പ്രൊജക്ടറിന്നുള്ള ശ്രമം നടക്കുന്നു.
2000 ലൂമിനൻസുള്ളത്‌ നമ്മുടെ കയ്യിലുണ്ട്‌.
ചുരുങ്ങിയത്‌ 300 പേരെയെങ്കിലും [ബ്ലോഗർ മാരെ കൂടാതെ] പങ്കെടുപ്പിക്കണം എന്നാണ് സ്വാഗതസംഘം കരുതുന്നത്‌.
പരമാവധി ബ്ലോഗർ മാരെ പങ്കാളികളാക്കാനും ബ്ലോഗിങ്ങിന്റെ സമകാലീന അനുഭവങ്ങളേയും ചില തെറ്റായപ്രവണതകളേയും വിശകലന വിധേയമാക്കാൻ ഈ ശിൽപശാലക്ക്‌ കഴിയുമെന്നും സംഘാടകർ കണക്കാക്കുന്നു.
ഈ കുറിപ്പ്‌ ക്ഷണമായ്‌ സ്വീകരിച്ച്മുഴുവൻ ബ്ലോഗർമ്മാരും ശിൽപശാലയിൽ പങ്കാളികളാവണമെന്ന് വിനയപൂർവ്വം അഭ്യർത്ഥിക്കുന്നു

ബ്ലൊഗ് അങ്കം വടകരയില്‍ !!!

2009-04-18T05:30:00.000-07:00

2009 മെയ് 3ന് ഉച്ചക്ക് 1 മണിക്ക് വടകര മുനിസിപ്പൽ പാർക്ക്‌ ഓഡിറ്റോറിയത്തിൽ ആണ് ശില്‍പ്പശാല നടത്തപ്പെടുന്നത്. പ്രസ്തുത ബ്ലോഗ് ശില്‍പ്പശാലയില്‍ പങ്കെടുക്കാന്‍ താല്‍പ്പര്യമുള്ള ബ്ലോഗര്‍മാരും,ബ്ലോഗ് തുടങ്ങാന്‍ ആഗ്രഹിക്കുന്ന ബ്ലോഗ് വായനക്കാരും ശില്‍പ്പശാലയില്‍ പങ്കെടുക്കുന്നതിനായി ശില്‍പ്പശാലയുടെ മുഖ്യ സംഘാടകനായ കടത്തനാടനുമായി ബന്ധപ്പെടണമെന്ന് അഭ്യര്‍ത്ഥിക്കുന്നു.
പങ്കെടുക്കാൻ ആഗ്രഹിക്കുന്നവർ ബന്ധപ്പെടുക.കടത്തനാടന്‍ : 9495317992
ചുരിക,വാള്‍,പരിച,കഠാര,വടി തുടങ്ങിയ പഴയആയുധങ്ങള്‍ക്ക് പകരം
ലാപ് ടോപ്പ്, വയര്‍ലെസ്സ് ബ്രോഡ് ബാന്‍ഡ് ഇന്റെര്‍നെറ്റ് കണക്ഷന്‍ , ചക്രായുധമായ സിഡി,മൌസ് എന്നിവയാണ് ബ്ലോഗ് കളരിയില്‍ കൊണ്ടുവരേണ്ട ആയുധങ്ങള്‍ :)))

പങ്കെടുക്കുക... മലയാളം ബ്ലോഗ് പ്രചരിപ്പിക്കുക ...

വടകര ബ്ലോഗ് ശില്‍പ്പശാല മെയ് 3ന്

2009-04-02T04:00:00.000-07:00

സുഹൃത്തുക്കളെ,
2009 മെയ് 3ന് ഉച്ചക്ക് 1 മണിക്ക് കോഴിക്കോട് ജില്ലയിലെ വടകരയില്‍ മുനിസിപ്പൽ പാർക്ക്‌ ഓഡിറ്റോറിയത്തിൽ ഒരു ബ്ലോഗ് ശില്‍പ്പശാല നടത്താന്‍ വടകരയിലെ പ്രമുഖ ബ്ലോഗേഴ്സും, ബ്ലോഗര്‍മാരാകാന്‍ താല്‍പ്പര്യപ്പെടുന്ന ചില സുഹൃത്തുക്കളും തയ്യാറെടുപ്പുകള്‍ ആരംഭിച്ചിരിക്കുന്നു.
പ്രസ്തുത ബ്ലോഗ് ശില്‍പ്പശാലയില്‍ പങ്കെടുക്കാന്‍ താല്‍പ്പര്യമുള്ള ബ്ലോഗര്‍മാരും,ബ്ലോഗ് തുടങ്ങാന്‍ ആഗ്രഹിക്കുന്ന ബ്ലോഗ് വായനക്കാരും ഈ ശില്‍പ്പശാലയില്‍ പങ്കെടുക്കുന്നതിനായി ശില്‍പ്പശാലയുടെ മുഖ്യ സംഘാടകനായ കടത്തനാടനുമായി ബന്ധപ്പെടണമെന്ന് അഭ്യര്‍ത്ഥിക്കുന്നു.

ശില്‍പ്പശാലയില്‍ പുതുതായി ബ്ലോഗ് തുടങ്ങുന്നവര്‍ക്കുള്ള മാര്‍ഗ്ഗനിര്‍ദ്ദേശങ്ങള്‍ നിലവിലുള്ള പ്രമുഖ ബ്ലോഗര്‍മാര്‍ നല്‍കുന്നതായിരിക്കും. കൂടാതെ ബ്ലോഗേഴ്സിന്റെ അനൌപചാരികമായ ഒത്തുകൂടല്‍ വേദിയായും ഈ ശില്‍പ്പശാലക്ക് പ്രസക്തി കൂടുതലുള്ളതിനാല്‍ മെയ് 3 ന് കേരളത്തില്‍ ഉള്ള പ്രവാസി ബ്ലോഗര്‍മാര്‍ തീര്‍ച്ചയായും ഈ സന്ദര്‍ഭം ഒത്തുചേരാനും, നേരില്‍ കാണാനുമുള്ള സുവര്‍ണ്ണാവസരമായി
മനസ്സിലാക്കി പ്രവര്‍ത്തിക്കുമെന്ന് ആശിക്കട്ടെ.
ഈ ബ്ലോഗ് ശില്‍പ്പശാലയെക്കുറിച്ചുള്ള കൂടുതല്‍ വാര്‍ത്തകളും,അറിയിപ്പുകളും കോഴിക്കോട് ബ്ലോഗ് അക്കാദമിയിലോ, കടത്തനാടന്റെ ബ്ലോഗിലോ പോസ്റ്റ് ചെയ്യപ്പെടുന്നതായിരിക്കും. പങ്കെടുക്കാൻ ആഗ്രഹിക്കുന്നവർ ബന്ധപ്പെടുക.കടത്തനാടന്‍ : 9495317992
വടകരയിലെ ബ്ലോഗ് ശില്‍പ്പശാല സംഘാടകര്‍:
അഡ്വ:സി ഭാസ്കരൻ .
നാരായണ നഗരം കുട്ടികൃഷ്ണൻ.
ഷർളിൻ ദാസ്‌ .
കെ എം ബാബു.
എ പി ശശിധരൻ മാസ്റ്റർ.
ഒഡേസ സത്യൻ.
എടച്ചേരി ദാസൻ.

കേരള ബ്ലോഗ് അക്കാദമിയുടെ ആഭിമുഖ്യത്തില്‍ നടത്തപ്പെടുന്ന ഒന്‍പതാമത്തെ ശില്‍പ്പശാലയായിരിക്കും വടകരയിലേത്. 2008 മാര്‍ച്ച് 23 ന് കണ്ണൂരില്‍ വച്ചായിരുന്നു ആദ്യ ശില്‍പ്പശാല. പിന്നീട്, ഏപ്രില്‍ 27 ന് കോഴിക്കോടും, മെയ് 18 ന് തൃശൂരും (തൃശൂര്‍ ചിത്രങ്ങള്‍), ജൂണ്‍ 1 ന് തിരുവനന്തപുരത്തും, ജൂലായ് 13 ന് മലപ്പുറത്തും ശില്‍പ്പശാലകള്‍ സംഘടിപ്പിച്ചിരുന്നു.പിന്നീട്, ആറാമത്തെ ബ്ലോഗ് ശില്‍പ്പശാല 2008 സെപ്തമ്പര്‍ 21നു വീണ്ടും കണ്ണൂരിലും.,ഏഴാമത് ശില്‍പ്പശാല വയനാട്ടിലെ മാനന്തവാടിയില്‍ നവംബര്‍ 2 നും,എട്ടാമത്തെ ശില്‍പ്പശാല ഡിസംബര്‍ 27 ആലപ്പുഴയിലും നടത്തിയിരുന്നു.

ടി.വി.റിപ്പോര്‍ട്ട് -കോഴിക്കോട് ബ്ലോഗ് ശില്പശാല

2008-05-09T01:15:00.000-07:00

കോഴിക്കോട് എപ്രില്‍ 27നു നടന്ന ബ്ലോഗ് ശില്പശാലയുടെ പത്ര റിപ്പോര്‍ട്ടുകള്‍ പോസ്റ്റ് ചെയ്തിരുന്നല്ലോ.ഇനി ചാനലുകളില്‍ വന്ന റിപ്പോര്‍ട്ടുകള്‍.

ആദ്യം അമ്യതാ ടി വി യില്‍ വന്ന റിപ്പോര്‍ട്ട്

ബ്ലോഗ്‌ ശില്‍പശാല ; വാര്‍ത്തകളിലൂടെ

2008-05-05T00:58:00.000-07:00

ബ്ലോഗ്‌ അക്കാദമിയുടെ നേതൃത്വത്തില്‍ കോഴിക്കോടു വെച്ചു നടന്ന ശില്‍പശാലയുമായി പത്ര-ദൃശ്യമാധ്യമങ്ങള്‍ നല്ലതുപോലെ സഹകരിച്ചിരുന്നു.

ശില്‍പശാലക്കുശേഷം പ്രധാന ദിനപത്രങ്ങളില്‍ 28-04-2008ന്‌ പ്രസിദ്ധീകരിച്ച വാര്‍ത്താ കഷ്‌ണങ്ങള്‍ ഇവിടെ കൊളുത്തി വെക്കട്ടെ :

(കൂട്ടത്തില്‍ ബ്ലോഗ്‌ ശില്‍പശാല വിജയിപ്പിക്കാന്‍ വല്ലാതെ വിയര്‍ത്ത മലബാറി , സുനില്‍ കെ. ഫൈസല്‍ , ഏറനാടന്‍ എന്നിവരെ പ്രത്യേകം അഭിനന്ദിക്കട്ടെ )

'ബൂലോക'ത്തിലേക്ക്‌ സ്വാഗതം

2008-05-02T04:14:00.000-07:00

കോഴിക്കോട്‌ നടന്ന ബ്ലോഗ്‌ അക്കാദമി ശില്‍പശാലയെ സംബന്ധിച്ച്‌ മാതൃഭൂമി ദിനപത്രത്തില്‍ വന്ന (28-4-2008) റിപ്പോര്‍ട്ട്‌ ഇവിടെ വായിക്കാം.

കോഴിക്കോട്‌:ആശയ വിനിമയത്തിന്റെ അനന്ത സാധ്യതകള്‍ പകരുന്ന ബ്ലോഗ്‌ ലോകത്തേയ്‌ക്ക്‌ നവാഗതരെ സ്വാഗതം ചെയ്‌തുകൊണ്ട്‌ കേരള ബ്ലോഗ്‌ അക്കാദമിയുടെ നേതൃത്വത്തില്‍ കോഴിക്കോട്ട്‌ മലയാളം ബ്ലോഗ്‌ ശില്‍പശാല സംഘടിപ്പിച്ചു. കോഴിക്കോട്‌ സഹകരണ അര്‍ബന്‍ ബാങ്ക്‌ ഓഡിറ്റോറിയത്തില്‍ നടന്ന ശില്‍പശാല പങ്കാളിത്തം കൊണ്ടും വിഷയത്തിന്റെ പുതുമകൊണ്ടും ഏറെ ശ്രദ്ധയാകര്‍ഷിച്ചു. എങ്ങനെ ബ്ലോഗ്‌ തുടങ്ങാമെന്നും എങ്ങനെ ബ്ലോഗിങ്‌ നടത്താമെന്നും ഇന്റര്‍നെറ്റിലെ മലയാളി കൂട്ടായ്‌മ എങ്ങനെ സജീവമാക്കാമെന്നതിനെയും വിശദമായി പ്രതിപാദിക്കുന്നതായിരുന്നു ശില്‍പശാല.

മലയാളം ബ്ലോഗ്‌ ലോകത്തെ പ്രശസ്‌തരുടെ കൂട്ടായ്‌മയില്‍ വിരിഞ്ഞ കേരള ബ്ലോഗ്‌ അക്കാദമിയുടെ രണ്ടാമത്‌ ശില്‍പശാലയായിരുന്നു കോഴിക്കേട്ടേത്‌. കഴിഞ്ഞ മാസം കണ്ണൂരിലായിരുന്നു ആദ്യ ശില്‍പശാല. പൂര്‍ണമായും ബ്ലോഗുകളിലൂടെ നല്‍കിയ പ്രചാരത്തിന്റെ അടിസ്ഥാനത്തിലാണ്‌ ശില്‍പശാല സംഘടിപ്പിക്കപ്പെട്ടത്‌. നൂറ്റമ്പതോളം പേര്‍ പങ്കെടുത്ത ശില്‍പശാലയില്‍ മലയാളം 'ബൂലോക'ത്തിലെ പ്രശസ്‌തര്‍ വിവിധ വിഷയങ്ങളില്‍ ക്ലാസ്സുകളെടുത്തു. പിന്നീട്‌ ബൂലോകത്തെ നവാഗതരുടെ ബ്ലോഗുകള്‍ തുടങ്ങിക്കൊണ്ട്‌ ബ്ലോഗ്‌ വിദ്യാരംഭവും നടന്നു.

ചിത്രകാരന്‍, ഏറനാടന്‍, കണ്ണൂരാന്‍, വിശ്വപ്രഭ, മലബാറി, അരീക്കോടന്‍, കെ.പി സുകുമാരന്‍ അഞ്ചരക്കണ്ടി, വി.കെ ആദര്‍ശ്‌, സുനില്‍ കെ ഫൈസല്‍ തുടങ്ങി പ്രശസ്‌തരായ ബ്ലോഗര്‍മാരാണ്‌ ക്ലാസുകള്‍ നിയന്ത്രിച്ചത്‌. ബ്ലോഗ്‌ലോകത്തെക്കുറിച്ച്‌ കെ.പി സുകുമാരന്‍, ശില്‍പശാലയുടെ ആവശ്യകതയെക്കുറിച്ച്‌ ഏറനാടന്‍, മലയാളം ടൈപ്പ്‌ ചെയ്യുന്നതിനെക്കുറിച്ചും ബ്ലോഗ്‌ തുടങ്ങുന്നതിനെക്കുറിച്ചും കണ്ണൂരാന്‍ സംഗീത ബ്ലോഗുകളെക്കുറിച്ച്‌ ടി.പ്രദീപ്‌ കുമാര്‍, ബ്ലോഗിന്റെ ഭാവിയെക്കുറിച്ച്‌ വി.കെ.ആദര്‍ശ്‌, എന്റെ ബ്ലോഗ്‌ അനുഭവങ്ങളെക്കുറിച്ച്‌ മൈന ഉമൈബാന്‍ തുടങ്ങിയവര്‍ സംസാരിച്ചു. സുനീഷ്‌ മലബാറി സ്വാഗതവും സുനില്‍ കെ.ഫൈസല്‍ നന്ദിയും പറഞ്ഞു.

രണ്ടു വര്‍ഷം മുമ്പ്‌ മാതൃഭൂമി വാരാന്തപ്പതിപ്പില്‍ വന്ന ബ്ലോഗുകളെക്കുറിച്ചുള്ള ലേഖനമാണ്‌ ബൂലോകത്തിലേക്ക്‌ പലരെയും അടുപ്പിച്ചതെന്ന്‌ ശില്‍പശാലയില്‍ പങ്കെടുത്ത മിക്കവരും അഭിപ്രായപ്പെട്ടു. ഇന്ന്‌ മലയാളത്തില്‍ മുവ്വായിരത്തോളം ബ്ലോഗുകളുണ്ട്‌. ആയിരത്തിലധികം പേര്‍ സജീവമായി ബ്ലോഗിങ്‌ നടത്തുന്നു.

ചില ഫോട്ടോകള്‍ കൂടിയുണ്ട്‌....

2008-04-30T07:43:00.000-07:00

വിശ്വപ്രഭ മാഷിന്റെ മലയാളം വികിപീഡിയ എന്ന ഐഡിയ......

ബൂലോകത്തും ഒരു കൈ നോക്കാന്‍ ജെഫ്രീന....സമീപം കണ്ണൂരാന്‍ മാഷ്‌.....

ഇതു വെറും പച്ച വെള്ളമാട്ടോ....ആദര്‍ശ്‌,മലബാരി,തുടങ്ങിയവര്‍ അക്കാദമി മീറ്റിന്‌ ശേഷമുള്ള ഈറ്റിന്‌ കോഫീഹൗസില്‍..... സോറി....അടുത്ത മീറ്റിന്റെ ചര്‍ച്ചക്കിടയില്‍......

ആദര്‍ശ്‌,മണിക്കുട്ടി,ഏറനാടന്‍,സുനില്‍ എന്നിവര്‍ കൂടി കോഫീഹൗസില്‍.....

ബെര്‍ലിയോടൊപ്പം

2008-04-27T19:52:00.000-07:00

വാദപ്രതിവാദ സമയത്ത് ചോര വീഴ്ത്തുമെങ്കിലും ഞങ്ങള്‍ ഒന്നാണ് ഞങ്ങള്‍ കൂട്ടുകാര് ബെര്‍ലിയോടൊപ്പം ഏറനാടനും സുകുമാരേട്ടനും

ശില്‍പ്പശാല ചിത്രങ്ങളിലൂടെ....

2008-04-27T18:30:00.000-07:00

ദേശാഭിമാനി കണ്ണൂര്‍ ഏഡിഷനില്‍ വന്ന വാര്‍ത്തയുടെ സ്കാന്‍ ചെയ്ത കോപ്പി ഇടുന്നു.കോഴിക്കോട്ടെ പത്രങ്ങള്‍ ബ്ലോഗ് ശില്‍പ്പശാലക്ക് നല്ല പ്രാധാന്യം നല്‍കിയിട്ടുണ്ട്. അതുവഴിയെ ഇവിടെ തന്നെ പ്രസിദ്ധീകരിക്കാം.ദേശാഭിമാനിക്ക് ബ്ലോഗ് അക്കാദമി നന്ദി പറയുന്നു.

വി.കെ.ആദര്‍ശ് ബ്ലോഗിന്റെ പ്രസക്തിയെക്കുറിച്ചും,സിറ്റിസണ്‍ ജേര്‍ണലിസത്തിന്റെ സമൂഹ ശുദ്ധീകരണ ശേഷിയെക്കുറിച്ചും ക്ലാസ്സെടുക്കുന്നു.

ബ്ലോഗാര്‍ത്ഥികള്‍ക്ക് വിദ്യാരംഭം നടത്തുന്നത് എല്‍.സി.ഡി പ്രൊജക്റ്ററിലൂടെ സ്ക്രീനില്‍ പ്രദര്‍ശിപ്പിക്കാനായതിനാല്‍ ...ചടങ്ങ് അനായാസമായി നടത്താനാകുന്നു. മണിക്കുട്ടിയുടെ നേതൃത്വത്തിലുള്ള ബ്ലോഗ് വിദ്യാരംഭം.

പെരിന്തല്‍മണ്ണയിലൊന്നും പോകുന്നില്ല. തമിഴ്നാട്ടിലെ ജോലിസ്ഥലത്തുനിന്നും എത്തിയ തോന്ന്യാസി കണ്ണൂരാനുമായി സൌഹൃദത്തിന്റെ നിറവില്‍... ആത്മസംതൃപ്തിയുമായി.

മാതൃഭൂമി എഡിറ്റോറിയല്‍ വിഭാഗത്തിലെ ബ്ലോഗേഴ്സ് കൂടിയായ (വലത്തുനിന്ന്)ടി.സുരേഷ് ബാബു (ബ്ലോഗ്‌:വിദേശ സിനിമ(ലോങ്ങ് ഷോട്ട്സ്) ആര്‍.ഗിരീഷ് കുമാര്‍ (എന്‍.ആര്‍.ഐ.ലോകം)......

ഉര്‍ജ്ജ്വസ്വലമായ സംഘാടക പ്രാവീണ്യവുമായി മലബാറി സുനീഷ്. ..., കെ.പി.സുകുമാരേട്ടന്റെ കൂടെ.

തോന്ന്യാസി, കണ്ണൂരാന്‍,വി.കെ.ആദര്‍ശ് എന്നിവര്‍ പ്രാരംഭപ്രവര്‍ത്തനങ്ങള്‍ ബൂലോകത്തെ അറിയിച്ചുകൊണ്ടിരിക്കെ ഏറനാടനും സുനീഷും സംഘാടകത്വത്തിന്റെ വിയര്‍പ്പില്‍ വേദിയൊരുക്കുന്നു.

ബ്ലോഗ് സഹോദരങ്ങള്‍ക്ക് സ്വാഗതം.... നന്മയുടെ നഗരത്തിലേക്ക് !!!

എന്റെ ബ്ലോഗ് അനുഭവങ്ങള്‍. യുവ എഴുത്തുകാരിയായ മൈന ഉമൈബാന്‍ ബ്ലോഗിലേക്ക് എത്തിപ്പെട്ട വഴികള്‍ വിവരിക്കുന്നു.

കണ്ണൂരുവച്ചു നല്‍കിയ വാക്കുപാലിക്കുന്നതിന്റെ ചാരിതാര്‍ത്ഥ്യം. ഒരു മാസം മുന്‍പ് കണ്ണൂരിലെ ശില്‍പ്പശാലയില്‍ പങ്കെടുത്തപ്പോള്‍ കോഴിക്കോട് ശില്‍പ്പശാല ഉടന്‍ എന്നു സധൈര്യം പ്രഖ്യാപിച്ച ഏറനാടന്‍ ബ്ലോഗേഴ്സിനോട് സംസാരിക്കുന്നു.

നിറഞ്ഞ സദസ്സില്‍ കണ്ണൂരാന്റെ സോദോഹരണ ബ്ലോഗ് എങ്ങിനെ നിര്‍മ്മിക്കാം എന്ന ക്ലാസ്സ്. എല്‍.സി.ഡി പ്രൊജക്റ്ററിന്റെ സഹായത്തോടെ.

ബ്ലോഗര്‍ ഡി.പ്രദീപ്കുമാര്‍(തൃശൂര്‍ ആകാശവാണി) പോഡ് കാസ്റ്റിങ്ങിനെക്കുറിച്ച് (ഓഡിയോ)ക്ലാസ്സെടുക്കുന്നു. ഗ്രീന്‍ റേഡിയോ,എം.പോഡ്,.....തുടങ്ങിയവയുടെ സാധ്യത റേഡിയോയുടെ പരിമിതികളെ മറികടക്കുന്നതിന്റെ ആത്മവിശ്വാസം ആ വാക്കുകളില്‍ ധ്വനിച്ചിരുന്നു.

സ്വന്തം ഈ-മെയില്‍ വിലാസം മറന്നുപോയതിനാല്‍ വിദ്യാരംഭം പൂര്‍ത്തിയാക്കാനായില്ലെങ്കിലും.... കേരളത്തിലെ ആദ്യ വനിതാ ഓട്ടോ ഡ്രൈവറായ ജഫ്രീന ബ്ലോഗാര്‍ത്ഥി വിദ്യാരംഭവേദിയില്‍ ബ്ലൊഗ് മാഷ് കണ്ണൂരാനോടൊപ്പം.

അരീക്കോടന്‍ മാഷ്, ഫൈസല്‍, വിശ്വപ്രഭ, ഡി.പ്രദീപ് കുമാര്‍... സൌഹൃദ വേദികൂടിയായ ബ്ലോഗ് ശില്‍പ്പശാലയില്‍.

ചിത്രകാരന്റെ ഭ്രാന്തിനു സ്നേഹത്തോടെ കാവലിരിക്കുന്ന മകന്‍ അച്ചു.എം.ആര്‍.

ബ്ലൊഗ് ശില്‍പ്പശാല നമുക്ക് അനായാസം സംഘടിപ്പിക്കാന്‍ സഹായിച്ച സ്പോണ്‍സറായ കം‌പ്യൂട്ടര്‍ പ്ലസ്സ്(ചുവരിലെ ബാനര്‍ നോക്കുക)എന്ന സ്ഥാപനത്തോട് നന്ദി പറയുന്ന കോളേജ് അധ്യാപകനും, പ്രമുഖ ബ്ലോഗറുമായ നമ്മുടെ സഹോദരന്‍ അരീക്കോടന്‍ മാഷ്.

.......................................................................

നമ്മുടെ ബ്ലോഗ് മാഷ് കണ്ണൂരാന്‍ കണ്ണൂര്‍ ബ്ലോഗ് അക്കാദമിയിലും, പിന്നെ അവിടെനിന്നും ഒഴിവാക്കി കേരള ബ്ലോഗ് അക്കാദമിയിലും പോസ്റ്റിയ കോഴിക്കോട് ശില്‍പ്പശാലയെക്കുറിച്ചുള്ള അവലോകന റിപ്പോര്‍ട്ട് വായനക്കാരുടെ സൌകര്യാര്‍ത്ഥം ഇവിടെ കോപ്പി പേസ്റ്റുന്നു.

കോഴിക്കോട് ബ്ലോഗ് ശില്പശാല, ഒരവലോകനം.

വളരെയേറെ പ്രതീക്ഷയോടെ കാത്തിരൊന്നൊരു ദിവസമായിരുന്നു ഇന്ന്. 3-4 ആഴ്ചകള്‍ നീണ്ട ശ്രമത്തിന്റെ പര്യവസാനം.

കണ്ണൂരില്‍ നടന്ന ബ്ലോഗ് ശില്പശാലയില്‍ പങ്കെടുത്ത ഏറനാടന്റെയും, ആദിത്യനാഥിന്റെയും താല്പര്യപ്രകാരമായിരുന്നു കോഴിക്കോട് ശില്പശാല നടത്തണമെന്ന തീരുമാനം. തുടര്‍ന്ന് പോസ്റ്റിലൂടെയും ഫോണിലൂടെയും സുനില്‍.കെ.ഫൈസല്‍, മലബാറി, മൈന തുടങ്ങിയ ബ്ലോഗര്‍മാരും ചേര്‍ന്ന് ഈ ദൌത്യം ഏറ്റെടുത്തു. പത്രദൃശ്യമാധ്യമങ്ങള്‍ ബ്ലോഗ് ശില്പശാല നടക്കാന്‍ പോകുന്നുവെന്ന് വളരെ ഭംഗിയായി തന്നെ റിപ്പോര്‍ട്ട് നല്‍കിയതിനാല്‍ പങ്കെടുക്കാന്‍ 100ലധികം ബ്ലോഗാര്‍ത്ഥികള്‍ ടെലഫോണിലൂടെ രജിസ്ട്രേഷന്‍ നടത്തിയിരുന്നു. ബൂലോഗത്തെപ്പറ്റിയും, ബ്ലോഗിംങ്ങിനെക്കുറിച്ചും ആദ്യപാഠങ്ങള്‍ 6 പേജ് വരുന്ന ചെറിയ കുറിപ്പ് തയ്യാറാക്കിയിരുന്നു.
ഉച്ചക്ക് 2 മണിക്കാണ് ബ്ലോഗ് ശില്പശാല നടത്താന്‍ നിശ്ചയിച്ചിരുന്നതെങ്കിലും ഞങ്ങള്‍ രാവിലെ 9 മണിക്കു തന്നെ വേദിയില്‍ എത്താമെന്നായിരുന്നു തീരുമാനം. കണ്ണൂരില്‍ നിന്നും ഞാനെത്തുമ്പോഴേക്കും മലബാറി കൊല്ലത്തു നിന്നും എത്തിയ വി.കെ.ആദര്‍ശുമായി സംസാരിക്കുകയായിരുന്നു. തുടര്‍ന്ന് ചിത്രകാരന്‍, ഏറനാടന്‍, സുനില്‍.കെ.ഫൈസല്‍ എന്നിവരെത്തി. ശില്പശാല നടക്കുന്ന ഹാളിലേക്ക് നീങ്ങുമ്പോഴേക്കും ശില്പശാലയില്‍ പങ്കെടുക്കാനായി തമിഴ് നാട്ടിലെ ആണ്ടിപ്പട്ടിയില്‍ നിന്നും തോന്ന്യാസിയും എത്തിച്ചേര്‍ന്നു. തുടര്‍ന്ന് മണിക്കുട്ടിയും, ആദിത്യനാഥും എത്തി. ബ്ലോഗര്‍മാര്‍ എത്തിയതോടെ ഹാളിലും പുറത്തും ആവശ്യമായ ക്രമീകരണങ്ങള്‍ നടത്തി, ബാനറുകള്‍ കെട്ടി, കുടിവെള്ളം എത്തിച്ചു. പിന്നാലെ നിത്യന്‍, വിശ്വപ്രഭ എന്നീ ബ്ലോഗര്‍മാരും എത്തിച്ചേര്‍ന്നു. നെറ്റ് കണക്ഷന്‍, എല്‍.സി.ഡി. പ്രൊജക്ടര്‍ എന്നിവ തയ്യാറാക്കി, ഒരുക്കങ്ങള്‍ സംബന്ധിച്ച പോസ്റ്റ് പബ്ലിഷ് ചെയ്യുകയും ചെയ്തു. ഊണു കഴിച്ചെത്തുമ്പോഴേക്കും ബ്ലോഗാര്‍ത്ഥികള്‍ എത്തി തുടങ്ങിയിരുന്നു.
മലപ്പുറത്തെ മദ്രസ അധ്യാപകനായ പി.ബഷീറാണ് ആദ്യമെത്തിയത്. വന്ന എല്ലാവരും വളരെ പ്രതീക്ഷയോടെയായിരുന്നു ശില്പശാലയെ ഉറ്റു നോക്കിയിരുന്നത്. പലതവണ സ്വന്തമായി പരിശ്രമിച്ചിട്ടും ബ്ലോഗുണ്ടാക്കാന്‍ സാധിക്കാതെ പോയവര്‍, ബ്ലോഗുണ്ടാക്കിയെങ്കിലും മലയാളത്തില്‍ എങ്ങിനെ എഴുതും എന്നറിയാത്തവര്‍, ബ്ലോഗെന്താണെന്നറിയാത്തവര്‍ അങ്ങിനെ എല്ലാ തരം ആളുകളും ഉണ്ടായിരുന്നു. ചെറിയ കുട്ടികള്‍ മുതല്‍ വിശ്രമജീവിതം നയിക്കുന്ന മുതിര്‍ന്ന പൌരന്മാര്‍ വരെ. ഓട്ടോ റിക്ഷാ തൊഴിലാളികള്‍ മുതല്‍ ഡോക്ടര്‍മാര്‍ വരെ. നമ്മുടെ മലയാളി സമൂഹത്തിന്റെ എല്ലാ തുറകളുലുമുള്ളവര്‍ ശില്പശാലക്കെത്തിയിരുന്നു എന്നത് ശുഭ സൂചനയാണ്. ഏകദേശം 250ല്‍ അധികം ആളുകള്‍ ശിലപശാലയില്‍ പങ്കെടുത്തു. വളരെ ആവേശത്തോടെയാണെല്ലാവരും പങ്കെടുക്കാനായെത്തിയതെന്നത് എടുത്തു പറയേണ്ടതാണ്. കോഴിക്കോട് ജില്ലയില്‍ നിന്നു മാത്രമല്ല, അയല്‍ജില്ലകളായ കണ്ണൂര്‍, വയനാട്, മലപ്പുറം, പാലക്കാട് എന്നീ ജില്ലകളില്‍ നിന്നു പോലും ബ്ലോഗാര്‍ത്ഥികള്‍ എത്തിയിരുന്നു. മലപ്പുറം ജില്ലയില്‍ നിന്നും നിരവധി പേര്‍ എത്തിച്ചേര്‍ന്നിരുന്നു എന്നത് പ്രത്യേകം ശ്രദ്ധേയമായി.

ബ്ലോഗാര്‍ത്ഥികളെ പോലെ തന്നെ വളരെ ആവേശത്തോടെയാണ് ബൂലോഗരും ശിലപശാലയെ കണ്ടത്. ബെര്‍ളി തോമസ്, ഡി.പ്രദീപ് കുമാര്‍, മൈന, അരീക്കോടന്‍, ദ്രൌപതി, ടി.സുരേഷ്ബാബു, ആര്‍.ഗിരീഷ് കുമാര്‍, പ്രസാദ് വിമതം, കെ.പി.റഷീദ് (കവിതക്കൊരിടം), ഫൈസല്‍ പൊയില്‍, മിനീസ്, സഹ്യന്‍, പ്രസാദ്കുമാര്‍, കയ്യെഴുത്ത്, മുരളിക, ഷാ‍ഫി (പെരുവഴി), മനോജ് കാട്ടാമ്പള്ളി തുടങ്ങിയ ബ്ലോഗര്‍മാരും എത്തിയിരുന്നു. (വല്ലവരുടെയും പേരു വിട്ടു പോയെങ്കില്‍ ക്ഷമിക്കണം.).
രണ്ടുമണിക്കു തുടങ്ങാനായിരുന്നു നിശ്ചയിച്ചിരുന്നതെങ്കിലും 2.30നാണ് ശില്പശാല തുടങ്ങിയത്. ബ്ലോഗാര്‍ത്ഥികളെയും ബ്ലോഗര്‍മാരെയും ബ്ലോഗിണികളെയും കോഴിക്കോട് ബ്ലോഗക്കാദമിക്കു വേണ്ടി മലബാറി ഹൃദ്യമായി സ്വാഗതം ചെയ്തു. തുടര്‍ന്ന് ബ്ലോഗ് അക്കാദമിയുടെ ഉദ്ദേശ ലക്‍ഷ്യങ്ങളെക്കുറിച്ച് ചിത്രകാരന്‍ ഹ്രസ്വമായ ഒരാമുഖ പ്രസംഗം നടത്തി. ബ്ലോഗിന്റെ സാധ്യതകള്‍, ഉപയോഗങ്ങള്‍ എന്നിവ ലളിതമായ ഭാഷയില്‍ കെ.പി.സുകുമാരന്‍ അഞ്ചരക്കണ്ടി വിവരിച്ചു. ശില്പശാലയുടെ ലക്‍‌ഷ്യങ്ങള്‍ ഏറനാടന്‍ തന്റെ സ്വതസിദ്ധമായ ശൈലിയില്‍ വിവരിച്ചത് കാണിക്കള്‍ക്കേറെ രസിച്ചു.
തുടര്‍ന്ന് പ്രജക്ടറിന്റെ സഹായത്തോടെ എങ്ങിനെ യൂനിക്കോഡ് ഫോണ്ടുകള്‍ ഡൌണ്‍‌ലോഡ് ചെയ്ത് കം‌പ്യൂട്ടറില്‍ മലയാളം വായിക്കാമെന്ന് ഞാന്‍ വിവരിച്ചു. എഴുത്തുപകരണങ്ങള്‍ ഇന്‍സ്റ്റാള്‍ ചെയ്യുന്ന വിധം, ബ്ലോഗര്‍/വേര്‍ഡ് പ്രസ്സ് എന്നിവയില്‍ ബ്ലോഗുണ്ടാക്കുന്നവിധം, ബൂലോഗത്തെ പൊതുസ്ഥലങ്ങള്‍ എന്നിവയെക്കുറിച്ചും ഒരു ചെറിയ ക്ലാസ്സ് ഞാനെടുക്കുകയുണ്ടായി. (ആര്‍ക്കെങ്കിലും വല്ലതും പിടികിട്ടിയോ ആവോ?) മ്യൂസിക്ക് ബ്ലോഗിംഗിനെക്കുറിച്ചും പോഡ്കാസ്റ്റിനെക്കുറിച്ചും തൃശൂര്‍ ആകാശവാണിയിലെ ഉദ്യോഗസ്ഥനും പ്രമുഖ ബ്ലോഗറുമായ ഡി.പ്രദീപ് കുമാര്‍ വിശദമായ ക്ലാസ് നല്‍കി. തുടര്‍ന്ന് ആനുകാലികങ്ങളില്‍ സ്ഥിരമായെഴുതുന്ന വി.കെ.ആദര്‍ശ് ബ്ലോഗിന്റെ ഭാവിയെക്കുറിച്ചും, സാധ്യതകളെക്കുറിച്ചും അതീവ ലളിതമായി, നര്‍മ്മത്തില്‍ ചാലിച്ച് സംസാരിച്ച് സദസ്സിനെ കയ്യിലെടുത്തു. തുടര്‍ന്ന വിക്കിപീഡിയയെക്കുറിച്ചും അതിന്റെ പ്രാധാന്യത്തെക്കുറിച്ചും പ്രമുഖ ബ്ലോഗറായിരുന്ന വിശ്വപ്രഭ സംസാരിച്ചു. തന്റെ ബ്ലോഗനുഭവങ്ങളെക്കുറിച്ചും, എങ്ങിനെ ബ്ലോഗറായെന്നും മൈന സംസാരിച്ചു. അപ്പോഴേക്കും സമയം 5 മണിയായിരുന്നു. രണ്ടര മണിക്കൂര്‍ തുടര്‍ച്ചയായ ക്ലാസ്സുകള്‍ (എന്നെ പോലുള്ളവരുടെ കത്തിയും) ഉണ്ടായിട്ടും യാതൊരു മടുപ്പുമില്ലാതെ എല്ലാവരും ക്ലാസുകള്‍ ശ്രദ്ധിച്ചിരുന്നു. തുടര്‍ന്ന ബ്ലോഗാരംഭം നടന്നു. മണിക്കുട്ടിയും ഞാനും രണ്ട് ലാപ്ടോപ്പുകളുമായി ബ്ലോഗാര്‍ത്ഥികള്‍ക്ക് ആദ്യപാഠങ്ങള്‍ പകര്‍ന്നു. ആദ്യമായി ബ്ലോഗാരംഭിച്ചത് കേരളത്തിലെ ആദ്യ വനിതാ ഓട്ടോ റിക്ഷാ ഡ്രൈവറും കോഴിക്കോട്ടെ സാമൂഹ്യ സാംസ്കാരിക രംഗത്തെ സജീവ സാന്നിധ്യവുമായ ജെഫ്രീനയായിരുന്നു. ഒരു ഭാഗത്ത് ബ്ലോഗാരംഭം നടക്കുമ്പോള്‍ തന്നെ മറ്റൊരു ഭാഗത്ത് വി.കെ.ആദര്‍ശും മറ്റും ബ്ലോഗര്‍മാരുടെ സംശയങ്ങള്‍ക്ക് മറുപടി നല്‍കികൊണ്ടിരുന്നു. എല്ലാവരും പിരിയുമ്പോഴേക്കും ഓടിക്കിതച്ച് ദൃശ്യനും എത്തി നമ്മുടെ ശില്പശാലയില്‍ പങ്കാളിയായി. തികച്ചും സംതൃപ്തരായാണ് ശില്പശാലയില്‍ വന്നവര്‍ മടങ്ങിയത്, ഞങ്ങളും.
ശില്പശാലക്ക് പത്ര ദൃശ്യമാധ്യമങ്ങളില്‍ നിന്നുള്ള പിന്തുണ ഗംഭീരമായിരുന്നു. 10.30ന്റെ ഏഷ്യാനെറ്റ് ന്യൂസില്‍ നല്ലൊരു വാര്‍ത്ത വന്നു കഴിഞ്ഞു. എല്ലാ ചാനലുകളും പരിപാടി കവര്‍ ചെയ്തിട്ടുണ്ട്. ശില്പശാല വിജയമാക്കുന്നതിനു കോഴിക്കോട് ബ്ലോഗര്‍മാര്‍ വഹിച്ച പങ്ക് നിസ്തുലമാണ്. ബ്ലോഗിന്റെ ജനാധിപത്യവല്‍ക്കരണത്തെ ജനം രണ്ടു കൈയ്യും നീട്ടി സ്വീകരിക്കുകയാണ്.
ശില്പശാലക്ക് സ്പോണ്‍സര്‍ഷിപ്പ് നല്‍കിയ കം‌പ്യൂട്ടര്‍ പ്ലസിനും, മാധ്യമ സുഹൃത്തുക്കളോടും സര്‍വ്വോപരി എല്ലാ ബൂലോഗരോടുമുള്ള നന്ദി ഇവിടെ രേഖപ്പെടുത്തുന്നു.

..........................................................

കോഴിക്കോട് ബ്ലോഗ് ശില്പശാല ഒരുക്കങ്ങള്‍ പൂര്‍ത്തിയായി

2008-04-26T22:00:00.000-07:00

ബ്ലോഗ് അക്കാദമിയുടെ രണ്ടാം ബ്ലോഗ് ശില്പശാലയുടെ ഒരുക്കങ്ങള്‍ പൂര്‍ത്തിയായി. ബ്ലോഗ് ശില്പശാല നടക്കുന്ന കോഴിക്കോട് സഹകരണ അര്‍ബ്ബന്‍ ബാങ്ക് ഓഡിറ്റോറിയത്തില്‍ സംസ്ഥാനത്തിന്റെ വിവിധ ഭാഗങ്ങളില്‍ നിന്നും ബ്ലോഗര്‍മാര്‍ എത്തിതുടങ്ങി.

രാവിലെ 9 മണിമുതല്‍ പ്രവാഹം തന്നെയായിരുന്നു. കൊല്ലത്തുനിന്നും വി.കെ.ആദര്‍ശ് രാവിലെ തന്നെ എത്തി. തമിഴ്നാട്ടിലെ ആണ്ടിപ്പട്ടിയില്‍ നിന്നും തോന്ന്യാസിയും, കണ്ണൂരില്‍ നിന്നും ചിത്രകാരനും മകനും ലാന്റ് ചെയ്തു.

ശില്പശാലയുടെ സജ്ജീകരണങ്ങള്‍ ഒരുക്കിക്കൊണ്ട് ഏറനാടനും, മലബാറിയും, സുനില്‍ കെ.ഫൈസലും ഓടി നടക്കുന്നു.
അരീക്കോടന്‍ മാഷും കെ.പി.സുകുമാരന്‍ അഞ്ചരക്കണ്ടിയും നഗരത്തിലെത്തിക്കൊണ്ടിരിക്കുന്നതായി അറിയിച്ചിട്ടുണ്ട്.

ഇന്നലെ കോഴിക്കോടു നിന്നുമിറങ്ങിയ സകലപത്രങ്ങളും ബ്ലോഗ് ശില്പശാലയെക്കുറിച്ചുള്ള വാര്‍ത്തകളാല്‍ സമ്പന്നമാണ്.

മാതൃഭൂമി - മലയാളം ബ്ലോഗ് ശില്പശാല 27ന്
മലയാള മനോരമ - വരൂ, ബ്ലോഗുകളുടെ ലോകത്തേക്ക്
മംഗളം - എഴുതാന്‍ തയ്യാറാണോ? പ്രസിദ്ധീകരിക്കാന്‍ ബ്ലോഗ് തയ്യാര്‍
മാധ്യമം - മലയാളം ബ്ലോഗ് ശില്പശാല 27ന്
ദീപിക - മലയാളം ബ്ലോഗ് ശില്പശാല കോഴിക്കോട് 27ന്
ദേശാഭിമാനി - മലയാളം ബ്ലോഗ് ശില്പശാല നാളെ
വര്‍ത്തമാനം - ബ്ലോഗ് ശില്പശാല 27ന്
ചന്ദ്രിക - മലയാളം ബ്ലോഗ് ശില്പശാല
കേരള കൌമുദി - ബ്ലോഗ് ശില്പശാല നാളെ കോഴിക്കോട്ട്
ദി ഹിന്ദു - Wokshop on Malayalam Blogging
ദി ന്യു ഇന്ത്യന്‍ എക്സ്പ്രസ്സ് - Kerala Blog Academy to hold Workshop

ഈ വാര്‍ത്തകള്‍ കൂടാതെ ദൃശ്യമാധ്യമങ്ങളും വളരെ നല്ല കവറേജ് നല്‍കിയിട്ടുണ്ട്. ഏഷ്യാനെറ്റ്, അമൃത, ഇന്ത്യാവിഷന്‍, മനോരമ ന്യൂസ് എന്നിവയിലും വാര്‍ത്തകള്‍ സം‌പ്രേക്ഷണം ചെയ്തിട്ടുണ്ട്.

കൃത്യം രണ്ടുമണിക്കു തന്നെ കാര്യപരിപാടികള്‍ ആരംഭിക്കണമെന്ന് ഉദ്ദേശിക്കുന്നു. കോഴിക്കോട് എത്താന്‍ പറ്റാത്ത സകല ബൂലോഗ കൂടപ്പിറപ്പുകളും ഞങ്ങളുടെ കൂടെയുണ്ടെന്ന വിശ്വാസം ഞങ്ങള്‍ക്ക് പ്രചോദനമാകുന്നു.

ഏറനാടാ‍ാ, ഞാനിതൊന്നു പൂര്‍ത്തിയാക്കട്ടെ, ആ ചായയും ചട്ടിപത്തിരിയും അവിടെ വെയ്യ്, അതു തീര്‍ക്കല്ലെ.. രാവിലെ 6 മണിക്ക് വീട്ടിന്നിറങ്ങിയതാ, ...

കോഴിക്കോട് പത്ര സമ്മേളനം

2008-04-25T18:58:00.000-07:00

27-04-2008 നു നടക്കുന്ന കോഴിക്കോട് ബ്ലോഗ് ശില്പ ശാലയെ ക്കുറിച്ച് കാലിക്കറ്റ് പ്രസ്സ്‌ ക്ലബ്ബില്‍ 25-04-2008 നു നടത്തിയ പത്ര സമ്മേളനത്തില്‍ നിന്ന്. കെ.പി. സുകുമാരന്‍ അഞ്ചരകണ്ടി, ഏറനാടന്‍ എന്നിവര്‍

കോഴിക്കോട് ബ്ലോഗ് ശില്‍പശാലയിലേക്കുള്ള വഴി

2008-04-25T18:37:00.000-07:00

എപ്രില്‍ 27 നു നടക്കുന്ന കോഴിക്കോട് ബ്ലോഗ് ശില്‍പശാല നടക്കുന്ന കാലികറ്റ് കോ-ഒപ്പ് അര്‍ബന്‍ ബാങ്ക് ആഡിറ്റോറിയത്തിലേക്കുള്ള വഴി പറഞ്ഞു തരാം.

കോഴിക്കോട് ടൌണില്‍ എവിടെ നിന്നാണെങ്കിലും കല്ലായി റോഡ് MCC BANK (KDC BANK HEAD OFFICE ) stop ല്‍ എത്തണം എന്ന് പറയുക. KDC Bank (Kozhikode District Co-operative Bank) , Head office കെട്ടിടത്തിന്റെ നേരെ എതിര്‍ ഭാഗത്താണ് കാലിക്കറ്റ് അര്‍ബന്‍ ബാങ്ക് ആഡിറ്റോറിയം . ഒരു പഴയ തറവാട് പോലെ അല്പം ഉള്ളിലോട്ട് ഉള്ള ഒരു കെട്ടിടമാണ് .

Railway Station ല്‍ നിന്നും വരുകയാണെങ്കില്‍ :- Link Road ലൂടെ 150 മീറ്ററോളം നടന്നാല്‍ കല്ലായി റോഡില്‍ എത്തും . അവിടെ നിന്നും വലത്തു ഭാഗത്തേക്ക് നടക്കുക. ഒരല്പം നടന്നാല്‍ KDC Bank കെട്ടിടവും കഴിഞ്ഞു , ഒരു പെട്രോള്‍ ബങ്കിനു നേരെ എതിര്‍ ഭാഗത്തായി Calicut Co-operative Urban Bank ബോര്‍ഡ് കാണാം. രാവിലെ 10 മണി മുതല്‍ ആളുണ്ടാവും. നേരത്തെ വന്നാല്‍ പരിചയപെടാമല്ലോ.

KSRTC Bus stand, പുതിയ ബസ് സ്റ്റാന്റ് (മൊഫ്യൂസല്‍ ബസ് സ്റ്റാന്റ്) തുടങ്ങി നഗരത്തിന്റെ ഏതു ഭാഗത്ത് നിന്നും ആട്ടോറിക്ഷയില്‍ വരുകയാണെങ്കില്‍ കല്ലായി റോഡ് MCC BANK Stop എന്ന് പറയുകയാണ്‌ തിരിച്ചറിയാന്‍ കൂടുതല്‍ എളുപ്പം. കോഴിക്കോട് ആട്ടോറിക്ഷാക്കാര്‍ മീറ്റര്‍ ചാര്‍ജ് മാത്രമേ വാങ്ങിക്കൂ. കൊല്ലില്ല. KSRTC Bus stand, പുതിയ ബസ് സ്ടാന്റ്റ് (മൊഫ്യൂസല്‍ ബസ് സ്ടാന്റ്റ് ) എന്നിവിടെ നിന്നും 13 രൂപ ഓട്ടോ ചാര്‍ജ് വരും. മാനാഞ്ചിറ നിന്നും മിനിമം ചാര്‍ജ് മാത്രം. സിറ്റി ബസില്‍ കയറിയാലും MCC bank സ്റ്റോപ്പില്‍ ഇറങ്ങാം.

ലാപ്‌ ടോപ് കൈവശമുള്ളവര്‍ കൊണ്ട് വരാന്‍ മറക്കില്ലല്ലൊ അല്ലെ! അപ്പോള്‍ നേരില്‍ കാണാം...
post scrap cancel

കോഴിക്കോട് ബ്ലോഗ് ശില്പശാലയുടെ ഒരുക്കങ്ങള് പുരോഗമിക്കുന്നു

2008-04-17T18:57:00.000-07:00

പ്രിയപ്പെട്ടവരെ....
ഈ മാസം 27നു നടക്കുന്ന കോഴിക്കോട് ബ്ലോഗ് ശില്പശാലയുടെ ഒരുക്കങ്ങള്‍ എല്ലാം നല്ല രീതിയില്‍ പുരോഗമിക്കുന്നു.
മനോരമ,മാത്യഭൂമി,ചന്ദ്രിക,ദീപിക,ദേശാഭിമാനി,മാധ്യമം,മംഗളം,കേരള കൌമുദി,രാഷ്ട്രദീപിക,വര്‍ത്തമാനം എന്നീ പത്രങ്ങളില്‍ റിപ്പോര്‍ട്ടുകള്‍ വന്നിട്ടുണ്ട്. കോഴിക്കോടുള്ള സ്വകാര്യ എഫ്.എം.സ്റ്റേഷനുകളായ റേഡിയോ മാംഗോയിലും എസ്.എഫ്.എമ്മിലും അറിയിപ്പുകള്‍ വരുന്നതായിരിക്കും.ഒപ്പം പ്രാദേശിക ചാനലുകലായ എ.സി.വിയിലും ജില്ലാ വാര്‍ത്തയിലും ഇന്നും നാളെയുമായി റിപ്പോര്‍ട്ട് വരുമെന്ന് പ്രതീക്ഷിക്കുന്നു.വരും ദിവസങ്ങളില്‍ ജില്ലയിലെ മറ്റ് പ്രാദേശിക ചാനലുകളിലും വാര്‍ത്ത വരുമെന്ന് പ്രതീക്ഷിക്കുന്നു.പ്രസ്സ് മീറ്റിനായി 25 നു പ്രസ് ക്ലബ് ബുക്കു ചെയ്തിട്ടുണ്ട്.

സാങ്കേതിക കാര്യങ്ങള്‍ക്കൊപ്പം ബ്ലോഗിന്റെ ചരിത്രവും സാമൂഹിക പ്രാധാന്യവും ക്ലാസുകളില്‍ ഉള്‍പ്പെടുത്തുന്നതായിരിക്കും .ക്ലാസുകള്‍ എല്ലാവര്‍ക്കും വ്യക്തമാവുന്നതിനായി പ്രൊജക്റ്റര്‍ ഉണ്ടാവുന്നതാണ്. രണ്ട് ലാപ് ടോപ്പുകളും യു.എസ്.ബി.നെറ്റ് കണക്ഷനും ഉറപ്പുവരുത്തിയിട്ടുണ്ട്.

ശില്പശാലയില്‍ വരുന്നവര്‍ക്ക് ലാപ് ടോപ്പ് ഉണ്ടെങ്കില് അത് കൊണ്ടുവരാവുന്നതാണ്.അതില്‍ മലയാളം ബ്ലോഗിംഗിനു ആവശ്യമായ സോഫ്റ്റ് വെയറുകള്‍ ഇന്സ്റ്റാള്‍ ചെയ്ത് നല്കുന്നതായിരിക്കും.ആവശ്യമുള്ളവര്‍കായി വിശദമായ ബ്ലോഗിംഗ് ട്യൂട്ടോറിയല്‍ സി.ഡി നല്കുന്നതിനും ആലോചിക്കുന്നുണ്ട്.

പത്രങ്ങളില്‍ വാര്‍ത്ത വന്നതോടെ നല്ല പ്രതികരണം ലഭിച്ചു തുട്ങ്ങിയിട്ടുണ്ട്. 17 നു ഉച്ച വരെ മാത്രം 50ല്‍ അധികം പേര് രജിസ്റ്റര്‍ ചെയ്തിട്ടുണ്ട്.

പ്രവര്‍ത്തനങ്ങള്‍ ഇനി മുന്നോട്ടു കൊണ്ടുപോകാന്‍ എല്ലവരുടേയും നിര്‍ദ്ദേങ്ങളും സഹകരണങ്ങളും പ്രതീക്ഷിക്കുന്നു.

കോഴിക്കോട്‌ ജില്ലാ ബ്ലോഗ്‌ ശില്‍പശാല ഏപ്രില്‍ 27-ന്‌ (ഞായറാഴ്‌ച)

2008-04-07T10:58:00.000-07:00

കോഴിക്കോട്‌ ജില്ലാ ബ്ലോഗ്‌ ശില്‍പശാല ഈ മാസം 27-ന്‌ (ഞായറാഴ്‌ച) ഉച്ചയ്ക്ക്‌ ശേഷം 2 മണിമുതല്‍ 6 മണിവരെ കോഴിക്കോട്‌ അര്‍ബന്‍ ബാങ്ക്‌ ഹാളില്‍ വെച്ച്‌ നടത്തുന്ന വിവരം സസന്തോഷം ഏവരേയും അറിയിച്ചുകൊള്ളുന്നു.

ഇന്നലെ നളന്ദ ഹോട്ടലിലെ ചര്‍ച്ചായോഗത്തില്‍ ശ്രീ.കെ.പി.സുകുമാരന്‍ അഞ്ചരക്കണ്ടി, ചിത്രകാരന്‍, കണ്ണൂരാന്‍, സുനില്‍ കെ ഫൈസല്‍ (മലയാളഗ്രാമം ബ്ലോഗുടമ), മൈന ഉമൈബാന്‍ (സര്‍പ്പഗന്ധി ബ്ലോഗിനുടമ), ഏറനാടന്‍ എന്നിവര്‍ പങ്കെടുത്തു. യോഗം പിരിഞ്ഞതിനു ശേഷം എല്ലാവരും ചേര്‍ന്ന് പലവിധം ഹാളുകളും പോയികണ്ടെങ്കിലും സീസണായതിനാല്‍ പലതും പലരും നേരത്തെ 'ബുക്കി'യിരുന്നു.

ഒടുവില്‍ റെയില്‍‌വേ സ്‌റ്റേഷനില്‍ നിന്ന് 200 മീറ്റര്‍ മാത്രം ദൂരമുള്ള കാലിക്കറ്റ് കോര്‍‌പ്പറേറ്റീവ് അര്‍‌ബന്‍ ബാങ്ക് ആഡിറ്റോറിയം (Calicut Co-op Urbun Bank Auditorium (kallai road), Opp.KDC Bank Building) ബുക്ക് ചെയ്തിരിക്കുന്നു. നമുക്കിത് ലഭിച്ചതൊരു മഹാഭാഗ്യമായി കരുതുന്നു, കാരണം സര്‍ഗ്ഗാത്മകതയും ഭാവനാശേഷിയും യഥേഷ്‌ടം മനസ്സില്‍ നിറയുന്നവിധം പഴയൊരു നാലുകെട്ട്‌ ശൈലിയിലാണ്‌ ആ കെട്ടിടം. പാളയം-കല്ലായി റോഡിനരികിലാണിത്‌.

പിന്നീട് എല്ലാവരും കോഴിക്കോട്ടെ മറ്റൊരു വിഖ്യാതബ്ലോഗറും പലരുടേയും ആരോമലുണ്ണിയും ഒരുകാലത്ത്‌ ബൂലോഗത്ത്‌ വിവാദക്കാറ്റ്‌പോലും ഉയര്‍ത്തിയ ദ്രൗപതിയെ കാണുവാന്‍ പുറപ്പെട്ടു. അവര്‍ ജോലിചെയ്യുന്ന പത്രമാപ്പീസില്‍ ഞങ്ങളെത്തി കൈയ്യോടെ പിടികൂടുകയും ഘെരാവോ പോലെ ചുറ്റും കൂടി വിശേഷം പറഞ്ഞ്‌ പിരിഞ്ഞു. ദ്രൗപതിയുടേയും സഹപ്രവര്‍ത്തകരുടേയും പൂര്‍ണ്ണപിന്തുണ ഉറപ്പായതില്‍ ഞങ്ങള്‍ അവരോട്‌ നന്ദി പറയാനും മറന്നില്ല. വാതിലിനടുത്ത്‌ വെച്ച്‌ മലയാളബ്ലോഗ്‌ ജനകീയമാക്കുന്നതിനെ കുറിച്ച്‌ ലഘുഭാഷണം നടത്തിയ സുകുമാരേട്ടന്‍ ഊര്‍ജസ്വലനായി ഒരു മഹാഭാഷണത്തിന്‌ തിരികൊളുത്തിയതായിരുന്നു. നേരമില്ലാനേരം ആയിരുന്നതിനാലും ദ്രൗപതി ഡ്യൂട്ടിക്ക്‌ കേറി നിമിഷങ്ങള്‍ ആയിട്ടുള്ളതിനാലും ദീര്‍ഘവിശദീകരണം ശില്‍പശാലയില്‍ വെച്ചാക്കാം എന്ന വാഗ്‌ദാനത്തോടെ സുകുമാരേട്ടന്‍ ഞങ്ങളോടൊപ്പം പോന്നു. അന്നേരം സന്ധ്യ മയങ്ങും നേരം ആയിട്ടുണ്ടായിരുന്നു.

ഓരോ ദിനവും ഒത്തിരിപേര്‍ ശില്‍പശാലയില്‍ താത്‌പര്യം പ്രകടിപ്പിച്ചും പങ്കെടുക്കാനും സഹായസഹകരണങ്ങളാലും ബന്ധപ്പെടുന്നത്‌ ആഹ്ലാദകരമായൊരു വസ്തുതയാണ്‌.

താല്‍പര്യമുള്ള ബ്ലോഗരും ബ്ലോഗാര്‍ത്ഥികളും (ഏത്‌ ജില്ലക്കാരായാലും) ഇവിടെ ഹാജര്‍ കമന്റിലൂടെ അറിയിക്കുവാന്‍ അഭ്യര്‍ത്ഥിക്കുന്നു. നമ്മുടെ ഈ ഉദ്യമം ജനകീയമാക്കുവാന്‍ എല്ലാവരുടേയും പിന്തുണ ഉണ്ടാവുമെന്ന് ആഗ്രഹിച്ചുകൊള്ളുന്നു

കോഴിക്കോട് ബ്ലോഗ് ശില്പശാല (ആലോചന)

2008-03-28T02:44:00.000-07:00

പ്രിയ മലയാളികളെ, ലോകത്തെങ്ങുമുള്ള മലയാളികളുടെ ഇന്റെര്‍നെറ്റിലൂടെയുള്ള കൂട്ടായ്മയുടെ ഭാഗമായി മലയാളം ബ്ലോഗ്ഗിങ്ങ് വളരെ പ്രചാരം നേടിക്കൊണ്ടിരിക്കുകയും, ഒട്ടേറെ മലയാളികള്‍ ബ്ലോഗിങ്ങ് രംഗത്തേക്ക് കടന്നുവരികയും ചെയ്യുന്ന ഇന്നത്തെ സാഹചര്യത്തില്‍ കോഴിക്കോട് വച്ച് പുതിയ ബ്ലോഗേഴ്സിനുവേണ്ടി ഒരു ശില്‍പ്പശാല നടത്തുന്നത് മലയാളം ബ്ലോഗിങ്ങിന്റെയും ബൂലോകത്തിന്റേയും ത്വരിത വികസനത്തിന് കാരണമാകും എന്നു പ്രതീക്ഷിക്കുന്നു. ബ്ലോഗിങ്ങിന്റെ സാങ്കേതിക വശങ്ങളെക്കുറിച്ച് പൊതുജനത്തിന് തീര്‍ത്തും സൌജന്യമായി മാര്‍ഗ്ഗനിര്‍ദ്ദേശങ്ങള്‍ നല്‍കാന്‍ നിലവിലുള്ള ബ്ലോഗേഴ്സ് കേരളാ ബ്ലോഗ് അക്കാദമി എന്ന പേരില്‍ ഒരു കൂട്ടായ്മയിലൂടെ ശ്രമിക്കുന്നതിന്റെ ഭാഗമാണ് ഈ ശില്‍പ്പശാലാ ആശയം ഉടലെടുത്തിരിക്കുന്നത്. ഇതിന്റെ ഭാഗമായി കണ്ണൂരില്‍ ഈ മാര്‍ച്ച് 23 ന് വിജയകരമായി ഒരു ശില്‍പ്പശാല നടത്തുകയുണ്ടായി. ശില്‍പ്പശാലയില്‍ വച്ചുതന്നെ നാലു “ബ്ലോഗാര്‍ത്ഥികള്‍“ പുതിയ മലയാളം ബ്ലോഗ് തുടങ്ങി എന്ന അഭിമാനകരമായ നേട്ടവും ബ്ലോഗ് അക്കാദമിയുടെ പ്രവര്‍ത്തനങ്ങള്‍ വിപുലപ്പെടുത്താന്‍ ഞങ്ങള്‍ക്ക് പ്രചോദനമേകുന്നുണ്ട്. ബ്ലോഗ് തുടങ്ങാന്‍ അഞ്ചു മിനിറ്റു സമയമേ വേണ്ടു എന്നു പറയാമെങ്കിലും, സ്വന്തം ബ്ലോഗ് തുടങ്ങുന്നവര്‍ അധികവും മലയാളം യൂണികോഡിനെക്കുറിച്ചുള്ള അറിവില്ലായ്മ നിമിത്തവും, സ്വന്തം ബ്ലോഗ് ശ്രദ്ധിക്കപ്പെടാനുള്ള സെറ്റിങ്ങ്സ് അറിയാത്തതിനാലും മലയാളികളുടെ ബ്ലോഗ് പൊതുസ്ഥലമായ “ബൂലോകം“ എന്ന സുപരിചിത ഭൂഖണ്ഡത്തില്‍ എത്തിച്ചേരാതെ ഒറ്റപ്പെട്ട് ബ്ലോഗിങ്ങ് മതിയാക്കുന്ന സ്ഥിതിവിശേഷവുമുണ്ട്. ഈ പ്രശ്നങ്ങളെ അഭിമുഖീകരിച്ച് പരിഹരിക്കുന്നതിനും, മലയാളം ബ്ലോഗിങ്ങ് ഒരു ജനകീയ മാധ്യമമായി വികസിപ്പിച്ചെടുക്കുന്നതിനും നിലവിലുള്ള ബ്ലോഗേഴ്സിന്റെ കൂട്ടായ്മയിലൂടെയും, ബ്ലോഗ്ഗെഴ്സല്ലാത്തവരുടെ സഹകരണത്തിലൂടെയും കേരളാ ബ്ലോഗ് അക്കാദമി ശ്രമങ്ങള്‍ നടത്താന്‍ ഉദ്ദേശിക്കുകയാണ്. ബ്ലോഗ് അക്കാദമിയുടെ ശില്‍പ്പശാലാ പ്രവര്‍ത്തനങ്ങളുമായി സഹകരിക്കാന്‍ തയ്യാറുള്ള ബ്ലോഗേഴ്സും, ബ്ലോഗ് ചെയ്യാന്‍ ആഗ്രഹിക്കുന്ന ബ്ലോഗാര്‍ത്ഥികളും, blogacademy@gmail.com എന്ന വിലാസത്തില്‍ ബന്ധപ്പെടുകയോ, കോഴിക്കോട് ബ്ലോഗ് അക്കാദമി കോണ്ട്രിബ്യൂട്ടര്‍മാരായ ഏറനാടന്‍, ആദിത്യനാഥ്, കാഴ്ച്ചക്കാരന്‍ എന്നീ ബ്ലോഗ് സുഹൃത്തുക്കളുമായി ബന്ധപ്പെട്ട് ബ്ലോഗ് ശില്‍പ്പശാലയുടെ ആസുത്രണത്തില്‍ പങ്കുകൊള്ളുകയോ ചെയ്യേണ്ടതാണ്. കേരളാ ബ്ലോഗ് അക്കാദമി എന്നത് നല്ല മനസ്സുകളുടെ ഒരു കൂട്ടയ്മ മാത്രമാണെന്നും, അതൊരു സംഘടനയോ, സ്ഥാപനമോ അല്ലെന്നും മലയാളം ബ്ലോഗിങ്ങിനെ ത്വരിതപ്പെടുത്താനുള്ള ആശയം മാത്രമാണെന്നും മനസ്സിലാക്കിക്കൊണ്ട് ഈ സദുദ്ദേശത്തെ ശക്തിപ്പെടുത്താന്‍ മുന്നോട്ടുവരുന്ന ആര്‍ക്കും വേദിയൊരുക്കുക എന്നതുമാത്രമാണ് ബ്ലോഗ് അക്കാദമിയുടെ ദൌത്യം. ബ്ലോഗിങ്ങ് ജനകീയമാക്കാനുള്ള ബ്ലോഗ് ശില്‍പ്പ ശാല ആശയവുമായി ബന്ധപ്പെട്ടു പ്രവര്‍ത്തിക്കാന്‍ ആഗ്രഹിക്കുന്നവര്‍ക്ക് ഇവിടെ കമന്റുകളായും ,മെയിലുകളാലും, സ്വയം സംഘടിക്കാവുന്നതാണ്. അഭിപ്രായങ്ങളുടേയോ, ഭേദഭാവങ്ങളുടേയോ തടസ്സങ്ങളില്ലാതെ, പരസ്പ്പര ബഹമാനത്തോടെ, അറിവുകള്‍ സ്വാര്‍ത്ഥതയില്ലാതെ കൈമാറാനുള്ള ഈ വേദിയെ നമുക്കുപയോഗപ്പെടുത്താം.